Plattdeutsch in Holzerode

Aus Wiki Göttingen
Wechseln zu: Navigation, Suche

Wee spreeket Platt

Dat Slachtefest freuer

Saun Slachten in use Kindheit mookete veele Arbeit! En Dach vorhär, dä Slachtedach un dän nächsten Dach ohk noch. Deerst mosste man nohn Huusslachter un dän Dach festemooken, denn dän Fleischbeschauer bestelln, dä mosste seck dat Swien vorher ankucken, ob et ohk munter was. Dän Vordach woord denn dä Brennetroch, Slachtedisch, sau fief bet sess Mollen und dat Flohmbrett herkrejen, dat mosste alles sauber moket wärn. Dä Kettel woord met Essig und Sohlte schuiert, we harrn nämlich ne Kuppernkettel. Denn woord ordentlich Holt un Knüste dobee benset. Up dän Slachtedach mosste alles klappen! Innekofft mosste ohk noch wärn. Jewürze we Sohlt, Pöpper, Semtkörn, Salpeter, Muskoht, Kömel un manchmohl ohk Knufflohk. Ach, un dä Wöstebändere nich verchetten! Thymian un Zwiebeln harrn we sölmest in Choarn. Dä Thymian woorte ribbelt un dänne mohln. No mosste ohk wat taun Kaffee sien un dohtau wörn Fettkröppels ebacken. Et mosste noch Wohter utn Born inn Kettel drocht wärn un Riesere in dä Fuierunge, domee an annern Morjen dat Fuier in aller Freue in Chang kamm, denn wenn de Slachter ümme de Ecken kucke, mosste dat Wohter kooken. No woort erst Kaffee drunken, denn dän Strick hä und dat Swien woord utn Stalle langet un festemooket. Metten Schussapperoht woort dat Swien betäubet un denne steeken.No mosste einer dä Schüsseln vorhohln und dat Blaut upfängen. Dat Blaut mosste sauforte quatschet wärn, domee et nich dickflüssig woort. Ohne Blaut kenne Rohtwost! No kamm dat Swien in Brennetroch und woort met dän koohkenden Wohter affebrennt. Jetzt mossten dä Mannsluie ran und met saune Chlocke dä Borsten affschrappen. Dä Borsten namm de Slachter me no Huus. No woort dat Swien hochehänget, noch en Emmer kohlt Wohter von oom schüttet un et was blank. Jetzt woort de Kopp und de Buuk uppesneen, Injeweie ruut un dä Flohm keim uppet Flohmbrett. Dat Swien woort innen schön utewoschen un dann woort erstemohl en Korten inneschüttet un Proste secht. Dä Slachter mooke denn dä Darm blank un ein Mann mosste dän Mogen säubern. Wenn Snei lach, ching et domee in Snei. Dä Blohse woort uppepustet. We langen össeck de Lewern rin, ein Dähl bleef tau Lewerwost, de annere woorte broet. Dä Kartuffeln kooken schon un et chaff en schön warm Freustücke metn Schnaps dohtau. Unkel un Tante wöhrn ohk innelohn un we chingen ohk no dän, wenn dä slachten. Twischendoor kamm ohk de Fleischbeschauer. Dohmols wasset dä ohle Karl Meier utn Winkel, met dän woort ohk en Korten drunken. Harre hei no beschauet un et was alles in Ornunge, woort dä Slachtedisch un dat Swien in twa Hälften rinnelanget. We harrn ümmer Swiene ower drei Zentner, dä harrn ohk schön hohen Speck un chaut Fleisch. Dohmohls woort noch veele Specke bruket. Buten was no alles sauber un dä Kettel was no met frischen Wohter füllt. Dat Fuier dorfte nich utchohn. Ohk in de Köken mosste et schön warm sien, domee dä Mettwost chaut woort. Dä Slachter deile no dat Swien up. Dat beste Fleisch tau Mettwost, Knokenfleisch un Speck keim inne Mollen taun Insohlten up dä Wöstekomern. Un dä Rest kamm in Kettel taun kooken. Denn wörn do noch dä twa Ohrn und dä veer Pöhtchen, dä mosste einer putzen, denn dohmols wörn dä noch an Fitzebohn ekooket; is jo hüte kenne Mode mär! No woort dä Fleischwolf fertichemooket un dat Fleisch mosste alles met eijener Kraft dooredräjet wärn, einmohl doort chrowe un denn doort feine Seewe – dat koste Kraft un Puste. Ja, wat Elektrisches chaff et noch nich! Noja, we wörn ümmer jenauch Luie un denn woort affewesselt. Was dat no alles dorjeöhrjelt, mossten dä Jewürze her. Sohlt, Pöpper, Semtkörn, Salpeter un ne Handvull Zucker kamm ohk an de Mettwost. No mänge dä Slachter alles ordentlich door un denn ching et and Mettwostmooken. Einer mosste Wöste binn, einer mosste dä Flohm ower dä Knüttelsticken näjen, weil dä ohk met Mette füllt wörn (dä smecke später am besten!). Nohn Kettel mosste ohk mohl einer kucken. Dat Fleisch dorfte nich tau weik wärn un et mosste ohk Fett affefüllt wärrn, süsst vakooke dat schöne Fleischfett. Jo, jo, Arbeit jenauch! Be dän Mettwostmooken do namm seck dä Slachter freuer veele Tied. Dä woorte drücket unne streichelt, domee se schön feste woort. Wee hoot selten hohle Woste hat. Was de Mettwost no fertich und dat Fleisch utn Kettel ruht, brochte einer alln Nachborn Fleischbreue hen. Un dä schöne Mettwost woort no oom brocht un hennelecht. No chaffet Kaffee un Fettkröppel, in dä Tied was dat Fleisch in dä Mollen kohlt. We mooken ümmer Sülten, Swornwost, Roht-, Witt- un Lewerwost. Ja, un denn noch en pohr Brejenwöste – Stücker achte. Jetzt mosste dä Slachter öseck erst en pohr schöhne Stückere Kettelfleisch ut de Molln chem. Jehacktes harrn we össeck vorher schone noom. Et woort ant Obendbroht dacht. Denn ching et an de Chohrwost, et mosste weer alles dooredräjet wärn. Einer snatt Kinkeln, Zwiebeln wörn blanke mooet un dä Slachter würze alles. Dat Blaut kamm an dä Rohtwost. Dä Tunge kamm met Rohtwost in dän Moogen, dat was dä schöhne leckere Moogenwost. Wenn dä Slachter no be dän Rohtwostmooken was un et wörn Kindere do, denn matte dän ohk flink ne kleine Wost an. Hei wische met dän Blautfingere moh ower de Backen un dä Kindere freuchten seck. Obens kreechten se ne kleine Wittwost, denn harrn se öhren Spohß. De Wost woort alle met de Hand in dä Darm drücket. Et wörn ohk Chlösere un Dosen vulle mooket. Dä lässte Sorte was dä Brejenwost, denn wassete schaffet. Man kooke denn Frischfleisch met soorn Kohl. No woort alles uppewoschen, dä Slachter kooke dä Wöste, Wöstefett mosste ohk affefüllt wärrn; denn langen we össeck utn Kettel en Emmer vull heite Bräue un doh woort de Köhken me schuiert, et was jo alles fettich! No chaffet Obendbroht. Soorn Kohl met Broht, Jehacktes un Kettelfleisch, do woort denn ohk en Schnaps twischendrunken – vor de Verdauunge! Dä soorn Kohl smecket meck hüte noch. Manchmohl keim denn ohk noch en pohr Utjekläete, dä wolln ohk chern vespern, denn chaffet wat de lachen. Dä kreechten denn än betten Kettelfleisch und Jehacktes mee. Dä Slachter mosste no Rekenunge mooken, et woord chliek betohlt. Et was en duiern un en soorn Dach un jeder was froh, dat dä Dach hän was! Un dän 3. Dach was ohk noch allerhand de daun. Wöste uphängen, Chlösere un Dohsen taumooken un kooken. Dä Flohm utbrohn, Fleisch- un Wöstefett derechte mooken, Kettel un de Mollen utwaschen un alles weer an Ort un Stehe bringen, denn was dä Dach ohke rümm! Hüte werd dat Swien no Boonsen brocht un Nohmedach koomet se met dä fertijen Wost, Fleisch un allen annern no Huus. Se hoot kenne Schweinerei in Huuse. Ower saun richtijet Slachtefest, sau we freuer, is dat hüte eben nich mer!

Autorin: Gertrud Beckmann. Aus: Festschrift 950 Jahre Holzerode, 2005

siehe auch:

Holzerode